టాలీవుడ్‌లో ప్రస్తుతం రీ రిలీజ్‌ల ట్రెండ్ నడుస్తోన్న సంగతి తెలిసిందే. కొత్త చిత్రాల కంటే నాటి కల్ట్ హిట్లే ఎక్కువగా సందడి చేస్తున్నాయి. రీ రిలీజ్ చేస్తుంటే థియేటర్లు హౌస్ ఫుల్ అవుతున్నాయి. పోకిరి, జల్సా, ఖుషి, ఆరెంజ్, ఈ నగరానికి ఏమైంది, సూర్య సన్నాఫ్ కృష్ణన్, రఘువరన్ బీటెక్ వంటి చిత్రాలు రీ రిలీజ్ విషయంలో ట్రెండ్ క్రియేట్ చేశాయి. ఇప్పుడు 7/జీ బృందావన కాలనీ రీ రిలీజ్ అయింది.
ఈ శుక్రవారం థియేటర్లోకి పెద్ద సినిమాలు ఏవీ రావడం లేదు. పెద్ద హీరో అంటే కన్నడ స్టార్ రక్షిత్ శెట్టి డబ్బింగ్ రూపంలో సప్త సాగరాలు దాటి అనే సినిమాతో వచ్చాడు. అంతో ఇంతో ఈ వారం కాస్త బజ్ ఉన్న సినిమా అంటే ఇదే. మిగిలినవన్నీ చిన్న చిత్రాలు రిలీజ్ అయ్యాయి. కానీ వాటన్నంటికంటే 7/జీ బృందావన కాలనీ సినిమా ఎక్కువగా ట్రెండ్ అవుతోంది.
7/జీ బృందావన కాలనీ సినిమాను తెలుగు ప్రేక్షకులు బాగానే సెలెబ్రేట్ చేసుకుంటున్నారు. ఇక యూత్ అయితే థియేటర్లో పిచ్చెక్కినట్టు ఎంజాయ్ చేస్తున్నారు. ప్రతీ పాటకు సందడి చేస్తున్నారు. థియేటర్లో చేస్తోన్న హంగామా, వాటికి సంబంధించిన వీడియోలు ఇప్పుడు సోషల్ మీడియాలో బాగానే వైరల్ అవుతున్నాయి. సినిమా చూస్తూ ఏడ్చేస్తున్నామని కొంత మంది ట్వీట్లు పెడుతున్నారు.రెండు తెలుగు రాష్ట్రాల్లో ఈ సినిమాను భారీ ఎత్తున రిలీజ్ చేస్తున్నారు. దాదాపు 1200కి పైగా షోలు ప్లాన్ చేశారు. 🎥🌟
