అప్పట్లో మల్లీశ్వరి సినిమా వస్తే టీవీల ముందు కళ్లప్పగించి మరీ చూసిన రోజులు గుర్తున్నాయా? అయినా అప్పుడు, ఇప్పుడు ఏంటి? ఎప్పటికీ ఇది ఓ ఎవర్‌గ్రీన్ సినిమానే. ఇంతకీ మేటర్ ఏంటంటే మల్లీశ్వరి సినిమా వచ్చి 20 ఏళ్లు అయిపోయింది.🌟🎞️
2004, ఫిబ్రవరి 18న మల్లీశ్వరి సినిమా రిలీజైంది. అంటే సరిగ్గా నేటికి 20 ఏళ్లు పూర్తయిందన్న మాట. ఆ అయితే ఏంటంటా? అని చాలామంది అనుకోవచ్చు. కానీ మల్లీశ్వరి సినిమాను నిజంగా ఎంజాయ్ చేసినవాళ్లు మాత్రం ఈ మాట అనలేరు. ఎందుకంటే ఇప్పటికీ బోర్ కొట్టినప్పుడు సరదాగా ఈ సినిమా పెట్టుకొని నవ్వుకునే వాళ్లు ఎంతోమంది ఉన్నారు. అంతగా ఈ సినిమా ఆడియన్స్‌కి కనెక్ట్ అయింది. అసలు ఈ సినిమా తర్వాత ఎంతమంది 'పెళ్లి కాని ప్రసాద్'లు త్వరగా పెళ్లి చేసుకున్నారో తెలుసా?
అసలు ఈ సినిమాలో వెంకటేశ్ చేసిన కామెడీకి ఇప్పటికీ కడుపుబ్బా నవ్వుకుంటూనే ఉంటాం. బ్యాంక్‌లో ఉద్యోగం చేస్తున్నా, అంత జీతం వస్తున్నా పెళ్లికి పిల్లని ఎవడూ ఇవ్వడం లేదేంట్రా అంటూ వెంకీ ఏడ్చే ఏడుపు.. ఆఫీసులో అందరూ వెంకీపై వేసిన పంచులు.. చూసి, విని ఎంతగా ఎంజాయ్ చేశారో ఆడియన్స్. ఇక ఈ సినిమాలో మల్లీశ్వరిగా కత్రినా కైఫ్ చూపించిన అందం, చేసిన నటన అందరినీ ఫిదా చేసింది.
ప్రిన్సెస్ అయిన మల్లీశ్వరిని పనిమనిషి అనుకొని వెంకీ మాట్లాడిన తీరు.. తీరా తన సంగతి తెలిసి తన కోసం ఖర్చు పెట్టిన బడ్డెట్ మొత్తం ఇవ్వాలని అడిగే సీను.. ఇలా ప్రతిదీ ఆద్యంతం నవ్విస్తూనే ఉంటుంది. ఇక సెకండాఫ్‌లో కనిపించేది కాసేపే అయిన సునీల్ చేసిన కామెడీ కూడా తక్కువేం కాదు. ముఖ్యంగా ఆ గడ్డి మేటు దగ్గర దెయ్యం కథ చెప్పే సన్నివేశం అయితే వేరే లెవల్.
ఇక క్లైమాక్స్‌లో ఈ కోటలో యువరాణిగా ఉండేకంటే అతని మనసులో మహారాణిగా ఉండటమే నాకు ఇష్టం అంటూ కత్రినా చెప్పిన డైలాగుకి థియేటర్లు మార్మోగిపోయాయి. ఈ రేంజ్‌లో ఆడియన్స్‌ను నవ్వించిన ఈ సినిమాకి అప్పుడే 20 ఏళ్లు పూర్తయ్యాయి అంటే కాస్త ఆశ్చర్యంగానే ఉంది. ఎందుకంటే చిన్నప్పటి నుంచి మనం టీవీలో ఈ సినిమా వచ్చిన ప్రతిసారి కళ్లు అప్పగించి చూసేవాళ్లం. రేపు మన పిల్లలు కూడా ఈ సినిమాను ఇంతే ఎంజాయ్ చేస్తూ చూస్తారు అనడంలో కూడా సందేహం లేదు. అంత గొప్పగా ఈ సినిమాకి డైలాగ్స్, స్టోరీ అందించారు త్రివిక్రమ్ శ్రీనివాస్. ఎప్పటికీ త్రివిక్రమ్ రాసిన గొప్ప సినిమాల్లో మల్లీశ్వరి కూడా ఒకటిగా నిలిచిపోతుంది. ఇక ఈ సినిమాకి కోటి ఇచ్చిన సంగీతం కూడా అంతే మధురంగా ఉంటుంది. మొత్తానికి అయితే మల్లీశ్వరికి 20 ఏళ్లు పూర్తవడంతో సినిమా మొత్తాన్ని 2 నిమిషాల్లో అలా చూపిస్తూ ఓ బ్యూటిఫుల్ వీడియోను వెంకీ మామ షేర్ చేశారు.🌟🎞️
