టీ పొడితో మనం టీని తయారు చేసుకొని తాగడం మాత్రమే మనకు తెలుసు. కానీ ఈ టీపొడితో మీ అందాన్ని కూడా రెట్టింపు చేసుకోవచ్చని తెలుసా? అవును, టీ పొడిలో యాంటీ ఆక్సిడెంట్స్ పుష్కలంగా ఉంటాయి. దీని వల్ల ముఖానికి రాసినప్పుడు స్కిన్ టోన్ మెరుగవుతుంది. అంతేకాదు, చర్మంపై ముడతలు తగ్గి అందంగా కనిపిస్తుంది. ఇందుకోసం తాజా టీ పొడి అవసరం లేదు. వాడిన టీ పొడిని కూడా వాడొచ్చు. టీ చేసుకున్న తర్వాత దీనిని ఫిల్టర్ చేసి పడేయకుండా పక్కన స్టోర్ చేసుకుంటే సరి. ఓ చెంచా అలోవెరా జెల్ తీసుకొని, దానిలో ఓ చెంచా టీపొడి మిక్స్ చేసి ముఖానికి అప్లై చేయాలి. 15 నిమిషాల తర్వాత మసాజ్ చేసి క్లీన్ చేసుకోవాలి. దీనిని వాడడం వల్ల ముఖంపైన ఉండే పెద్ద రంధ్రాలు, ముడతలు, ఫైన్‌లైన్స్ తగ్గుతాయి. అంతేకాదు, వృద్ధాప్య లక్షణాలు దూరమై యవ్వనంగా కనిపిస్తారు. ప్రతి రోజూ టీ చేశాక ఆ టీ పౌడర్‌ని పారేయొద్దు.. దీనిని చల్లార్చి గాజు సీసాలో స్టోర్ చేసుకోవాలి. దీనిని స్నానం చేసేటప్పుడు సబ్బు లేదా బాడీ వాష్ వాడే ముందు ఈ టీ పౌడర్‌ని ప్రతిరోజూ అప్లై చేసి స్క్రబ్‌లా రాయాలి. ఆ తర్వాత సబ్బుతో క్లీన్ చేయాలి. ఇలా చేయడం ద్వారా, డబుల్ క్లెన్సింగ్‌తో శరీరం పూర్తిగా క్లీన్ అవుతుంది. దీంతో చనిపోయిన చర్మ కణాలు కూడా ఎక్స్‌ఫోలియేట్ అవుతుంది. చర్మం మెరుస్తుంది. రక్తప్రసరణ కూడా పెరుగుతుంది.
