గత కొద్దికాలంగా దేశంలో పెట్రోల్, డీజిల్ ధరలు స్థిరంగా కొనసాగుతున్నాయి. అయితే, కర్ణాటక ప్రభుత్వం ఇటీవల ఇంధన ధరల విషయంలో కీలక నిర్ణయం తీసుకుంది. జూన్ 16, ఆదివారం నాడు కర్ణాటక కాంగ్రెస్ ప్రభుత్వం రాష్ట్రానికి అదనపు ఆదాయం సంపాదించడానికి పెట్రోల్, డీజిల్ ధరలను పెంచింది. వివరాల్లోకి వెళితే.. 🛢️
కర్ణాటక ఆర్థిక శాఖ ప్రకారం, బెంగళూరులో పెట్రోల్ ధర లీటరుకు ₹3 పెరిగి ₹99.84 నుండి ₹102.84కి చేరుకుంది. అదేవిధంగా, డీజిల్ ధర లీటరుకు ₹3.02 పెరిగి ₹85.93 నుండి ₹88.95కి చేరుకుంది.
నోటిఫికేషన్ ప్రకారం, పెట్రోల్‌పై అమ్మకపు పన్ను 25.92% నుండి 29.84%కి, డీజిల్‌పై పన్ను 14.3% నుండి 18.4%కి పెంచారు. ఈ గణనీయమైన పెరుగుదల రాష్ట్రవ్యాప్తంగా పెట్రోల్, డీజిల్ రెండింటి రిటైల్ ధరలను ప్రత్యక్షంగా ప్రభావితం చేసింది.
కర్ణాటకలో కాంగ్రెస్ ప్రభుత్వం ఈ నిర్ణయం తీసుకోవడంతో, ఆంధ్రప్రదేశ్ మరియు తెలంగాణలో కూడా ఇంధన ధరలు పెరుగుతాయేమోనని వాహనదారులు ఆందోళన చెందుతున్నారు. అయితే, ప్రస్తుతం తెలుగు రాష్ట్రాల్లో ఇంధన ధరలపై ఎలాంటి ప్రకటన చేయలేదు.
ప్రధాన నగరాలలో పెట్రోల్, డీజిల్ ధరలు 🏙️
హైదరాబాద్: పెట్రోల్ - ₹109.41, డీజిల్ - ₹95.46
వరంగల్: పెట్రోల్ - ₹106.84, డీజిల్ - ₹95.11
విజయవాడ: పెట్రోల్ - ₹109.65, డీజిల్ - ₹97.49
ఢిల్లీ: పెట్రోల్ - ₹94.72, డీజిల్ - ₹87.62
ముంబై: పెట్రోల్ - ₹104.21, డీజిల్ - ₹92.15
చెన్నై: పెట్రోల్ - ₹100.75, డీజిల్ - ₹92.34
కోల్‌కతా: పెట్రోల్ - ₹103.94, డీజిల్ - ₹90.76
ఇటీవల జరిగిన సార్వత్రిక ఎన్నికల ముందు, కేంద్ర ప్రభుత్వం ఇంధన ధరలను రూ. 2కు పైగా తగ్గించింది. నరేంద్ర మోడీ వరుసగా మూడవసారి ప్రధాన మంత్రిగా ప్రమాణస్వీకారం చేయడంతో, వాహనదారులు మరొకసారి పెట్రోల్, డీజిల్ ధరలను తగ్గిస్తారని ఎంతో ఆశగా ఎదురు చూస్తున్నారు. ప్రముఖ మీడియా సంస్థలు తమ రిపోర్ట్ లలో, ప్రపంచ మార్కెట్ లో క్రూడ్ ఆయిల్ ధరలు తగ్గడం వల్ల రానున్న రోజుల్లో ఇంధన ధరలు భారీగా తగ్గే అవకాశం ఉందని తెలిపారు.
జూన్ 2017 నుంచి దేశంలో పెట్రోల్ ధరలను ప్రతి రోజూ సవరిస్తున్నారు. ఈ పద్ధతిని డైనమిక్ ఇంధన ధర పద్ధతి అని అంటారు. అంతర్జాతీయ మార్కెట్ లో ముడి చమురు ధరలు పెరిగినప్పుడు మన దేశంలో కూడా ఇంధన ధరలు హెచ్చుతగ్గులకు గురవుతాయి.
