ఒడిశా ఎన్నికల్లో బీజూ జనతా దళ్ (బీజే) ఘోర పరాజయం పాలైన నేపథ్యంలో, పార్టీ అధినేత నవీన్ పట్నాయక్ సహాయకుడు వీకే పాండ్యన్ రాజకీయాల నుంచి తప్పుకుంటున్నట్టు ప్రకటించారు. పార్టీ ఓటమికి బాధ్యత వహిస్తూ పాండ్యన్ ఈ నిర్ణయం తీసుకున్నారు.
పూర్తి వివరాలు: నవీన్ పట్నాయక్‌కు సహాయం చేయడానికి రాజకీయాల్లోకి వచ్చిన పాండ్యన్, పార్టీ కార్యకర్తలు, నేతలకు ఉద్దేశిస్తూ ఓ భావోద్వేగ వీడియో సందేశం విడుదల చేశారు. ఈ సందర్భంగా ఆయన తన రాజీనామా ప్రకటించారు. తాను ఎవరికైనా నొప్పించినట్లయితే క్షమాపణలు చెబుతూ, తనపై దుష్ప్రచారం వల్ల పార్టీ ఓటమి కలిగినట్లు చెప్పారు.
"నవీన్ బాబుకు సహాయం చేసేందుకే నేను రాజకీయాల్లో ప్రవేశించా. ఇప్పుడు ఈ రంగం నుంచి తప్పుకునేందుకు నిర్ణయించుకున్నాను. ఈ ప్రయాణంలో నేను ఎవరినైనా నొప్పిస్తే క్షమాపణలు చెబుతున్నా. నాపై దుష్ఫప్రచారం పార్టీ ఓటమికి కారణం కావడం నన్ను బాధించింది. ఇంతకాలంగా నాతో కలిసి పనిచేసిన బీజే పరివారం సభ్యులందరికీ ధన్యవాదాలు. ఒడిశాకు ఎప్పటికీ నా మనసులో ప్రత్యేక స్థానం ఉంటుంది. నవీన్ బాబు నా ఊపిరి. మీరందరూ సుఖసంతోషాలతో ఉండాలని ఆ జగన్నాథుడిని ప్రార్థిస్తా’’ అని అన్నారు.
దాదాపు 12 ఏళ్ల క్రితం ఒడిశా ముఖ్యమంత్రి కార్యాలయంలో తన ప్రయాణం ప్రారంభించిన పాండ్యన్ ఇది తనకు దక్కిన గౌరవమని వ్యాఖ్యానించారు. నవీన్ బాబు నుంచి తాను ఎంతో నేర్చుకున్నానని, అవి తనకు జీవితాంతం వెన్నంటే ఉంటాయని అన్నారు.
నవీన్ పట్నాయక్ స్పందన: పాండ్యన్‌పై విమర్శలు సరికాదని నవీన్ పట్నాయక్ ముందే స్పష్టం చేశారు. పాండ్యన్ పార్టీ కోసం పనిచేసినా ఒక్క పదవి కూడా చేపట్టలేదని, తుఫానులు, కరోనా సంక్షోభ సమయంలో అద్భుత పని తీరు కనబరిచారని ఆయన కొనియాడారు.
