విరాట్ కోహ్లి చేయలేనిది స్మృతి మంధానా చేసింది. ఆర్సీబీకి తొలి డబ్ల్యూపీఎల్ టైటిల్ సాధించి పెట్టిన తర్వాత కోహ్లి వీడియో కాల్ చేయగా.. ఆర్సీబీ ఫ్యాన్స్ బెంగళూరు వీధుల్లో సంబరాలు చేసుకున్నారు.
ఆదివారం (మార్చి 17) రాత్రి ఢిల్లీలో ఢిల్లీ క్యాపిటల్స్ తో జరిగిన డబ్ల్యూపీఎల్ ఫైనల్ మ్యాచ్ లో ఆర్సీబీ 8 వికెట్లతో విజయం సాధించి విషయం తెలిసిందే. 2008 నుంచీ ఐపీఎల్లో ఉన్నా.. విరాట్ కోహ్లి, క్రిస్ గేల్, డివిలియర్స్, డుప్లెస్సి, మ్యాక్స్‌వెల్ లాంటి స్టార్లు ఉన్నా.. ఎప్పుడూ ఆర్సీబీ టైటిల్ గెలవలేకపోయింది. 2009, 2016లలో ఫైనల్ చేరినా ఓటమి తప్పలేదు.
కానీ ఆర్సీబీ మహిళల టీమ్ మాత్రం రెండో సీజన్ లోనే డబ్ల్యూపీఎల్ టైటిల్ గెలవడంతో ఆ ఫ్రాంఛైజీ ఆనందానికి అవధుల్లేకుండా పోయింది. దీంతో 16 ఏళ్లుగా ఆర్సీబీ ఫ్రాంఛైజీతోనే ఉన్న విరాట్ కోహ్లి ఫైనల్ తర్వాత స్మృతి మంధానా అండ్ టీమ్ కు ప్రత్యేకంగా వీడియో కాల్ చేశాడు. వాళ్లు ట్రోఫీ అందుకునే ముందు కాసేపు మాట్లాడాడు.
దీనికి సంబంధించిన వీడియో వైరల్ అవుతోంది. కోహ్లి మొదట కెప్టెన్ స్మృతితో మాట్లాడాడు. ఆ తర్వాత మొత్తం టీమ్ కు కూడా విషెస్ చెప్పాడు. విరాట్ ను చూడగానే ఆర్సీబీ గాళ్స్ ఆనందంతో గంతులేశారు. అంతేకాదు ఆర్సీబీ సూపర్ వుమెన్ ను పొగుడుతూ ఇన్‌స్టాగ్రామ్ లో కోహ్లి ఓ పోస్ట్ కూడా చేశాడు. ఇక ఐపీఎల్లో ఆర్సీబీకి ప్రస్తుతం ఆడుతున్న మ్యాక్స్‌వెల్, గతంలో ఆడిన క్రిస్ గేల్ కూడా కంగ్రాట్స్ చెప్పారు.16 ఏళ్ల తర్వాత ఆర్సీబీకి డబ్ల్యూపీఎల్ రూపంలో తొలి టైటిల్ రావడంతో బెంగళూరు ఫ్యాన్స్ ఆనందానికి అవధుల్లేకుండా పోయాయి. ఈ విజయం తర్వాత వాళ్లు బెంగళూరు వీధుల్లో సంబరాలు చేసుకున్నారు.🏏
