‘జవాన్’ మూవీ హవా బాక్సాఫీసు వద్ద కొనసాగుతూనే ఉంది. ఈ సినిమా 13 రోజుల్లో ప్రపంచ వ్యాప్తంగా రూ.883 కోట్లకు పైగా గ్రాస్ వసూలు చేసింది. ఇక హిందీ వెర్షన్ అయితే రికార్డుల మీద రికార్డులు సృష్టిస్తోంది.
‘జవాన్’ హిందీ వెర్షన్ రికార్డుల మీద రికార్డులు తిరగ రాస్తోంది. హిందీ వెర్షన్ 11 రోజుల్లోనే రూ.400 కోట్ల మార్కును అందుకున్న సంగతి తెలిసిందే. దీంతో వేగంగా రూ.400 కోట్ల క్లబ్‌లో చేరిన సినిమాగా ‘జవాన్’ రికార్డు సృష్టించింది. షారుఖ్ ఖాన్ చిత్రం ‘పఠాన్’ హిందీ వెర్షన్‌కు రూ.400 కోట్ల మార్క్ అందుకోవడానికి 12 రోజులు పట్టింది. అలాగే, సన్నీ డియోల్ సూపర్ హిట్ మూవీ ‘గదర్ 2’కు సైతం ఈ ఫీట్‌ను అందుకోవడానికి 12 రోజులు పట్టింది. ‘బాహుబలి 2’ (హిందీ)కి 15 రోజులు, ‘కె.జి.యఫ్ 2’ (హిందీ)కి 23 రోజుల సమయం పట్టింది. కానీ, ‘జవాన్’ మాత్రం కేవలం 11 రోజుల్లో కొట్టేసింది.
అయితే, ఇప్పుడు హిందీలో ‘జవాన్’ రూ.450 కోట్ల మార్కును అందుకుంది. 13 రోజుల్లో ‘జవాన్’ ఈ ఘనత సాధించింది. ‘గదర్ 2’ కూడా రూ.450 కోట్ల క్లబ్‌లో చేరింది. కాకపోతే ఆ సినిమాకు 17 రోజుల సమయం పట్టింది. ‘పఠాన్’ 18 రోజుల్లో రూ.450 కోట్లు వసూలు చేసింది. ‘బాహుబలి 2’ హిందీ వెర్షన్ సైతం రూ.450 కోట్ల క్లబ్‌లో ఉంది. కాకపోతే దీనికి 20 రోజుల సమయం పట్టింది. దీంతో హిందీలో అత్యంత వేగంగా రూ.450 కోట్లు వసూలు చేసిన సినిమాగా ‘జవాన్’ మరో రికార్డు సృష్టించింది. మొత్తం మీద జవాన్ రికార్డుల మీద రికార్డులు సృష్టించుకుంటూ వెళ్లిపోతుంది. ఈ సినిమా వసూళ్లు తగ్గినట్టే తగ్గి మళ్లీ పెరిగాయి. దీంతో రూ.1000 కోట్ల క్లబ్‌లో చేరడం ఖాయమని హిందీ ఇండస్ట్రీ వర్గాలు అంటున్నాయి.🎥💫
