వాట్సాప్ వినియోగదారులకు అలర్ట్‌. మెటా యాజమాన్యంలోని ప్రముఖ మెసేజింగ్ ప్లాట్‌ఫామ్ వాట్సాప్ భారత్‌లో ఒక్క నెలలోనే ఏకంగా 74 లక్షల అకౌంట్లు బ్యాన్ చేసి యూజర్లకు షాకిచ్చింది. ఐటీ నిబంధనలకు అనుగుణంగా ఆగస్టు నెలలో 74 లక్షల ఖాతాలను నిషేధించినట్లు వాట్సాప్ ఇండియా తాజాగా విడుదల చేసిన నివేదిక స్పష్టం చేస్తోంది. ఆగస్టు నెలలో మొత్తం 74 లక్షల ఖాతాలను బ్యాన్ చేయగా వీటిలో 35 లక్షల అకౌంట్లపై యూజర్ల నుంచి ఫిర్యాదులు రాకముందే ముందస్తుగా చర్యలు తీసుకోవడం విశేషం.
సంబంధిత అకౌంట్లపై యూజర్ల నుంచి అందిన ఫిర్యాదులు.. వాటిపై తీసుకున్న చర్యలతో పాటు ప్లాట్‌ఫామ్‌లో దుర్వినియోగాన్ని అరికట్టడానికి వాట్సాప్ సొంతంగా తీసుకున్ననివారణ చర్యల వివరాలు 'యూజర్-సేఫ్టీ రిపోర్ట్'లో ఉన్నాయి. ఆగస్టు 1 నుంచి ఆగస్ట్ 31 మధ్య, మొత్తం 74,20,748 వాట్సాప్ ఖాతాలను బ్యాన్ చేశామని.. వీటిలో 3,506,905 ఖాతాలపై యూజర్ల నుంచి ఫిర్యాదుల రాకపోయినా ముందస్తుగా చర్యలు తీసుకున్నట్లు వాట్సాప్ వెల్లడించింది. వాట్సాప్ జూన్ నెలలోనూ 66 లక్షలకు పైగా అకౌంట్లను బ్యాన్ చేసింది. 2023 జూన్ 1 నుంచి 30వ తేదీ మధ్య మొత్తం 6,611,700 వాట్సాప్ అకౌంట్లను బ్యాన్ చేసింది. ఇందులో 2,434,200 అకౌంట్లను ఫిర్యాదులతో సంబంధం లేకుండా ముందస్తుగా నిషేధించింది.
‘అకౌంట్స్ యాక్షన్డ్’ అనేది కంపెనీ ఒక అకౌంట్ నిషేధించడానికి.. పునరుద్ధరించడాన్ని సూచిస్తుంది. వినయోగదారుల నుంచి వచ్చే ఫిర్యాదులను ఆధారంగా చేసుకుని అకౌంట్లపై వాట్సాప్ నిషేధం విధిస్తోంది. ప్రభుత్వం ఈ ఏడాది గ్రీవెన్స్ అప్పీలేట్ కమిటీ (జీఏసీ)ని అనే వ్యవస్థను ప్రారంభించింది. ఈ పోర్టల్ లో నమోదైన ఫిర్యాదుల ఆధారంగా సోషల్ మీడియా ఫ్లాట్‌ఫామ్‌ నిర్ణయాలపై అప్పీలు చేసుకోవడానికి వినియోగదారుడికి అనుమతి ఇస్తుంది. వాట్సాప్‌ని దుర్వినియోగం చేస్తున్న క్రమంలో యూజర్ సేఫ్టీ దృష్ట్యా, వినియోగదారుల నుంచి అందిన ఫిర్యాదుల ఆధారంగా సదరు అకౌంట్లపై కంపెనీ బ్యాన్ విధిస్తోంది.
