ఇటీవల తెలంగాణ రాజకీయాల్లో కొన్ని ఆసక్తికరమైన విషయాలు కనిపిస్తున్నాయి. ముఖ్యమంత్రి రేవంత్ రెడ్డి సచివాలయానికి దూరంగా ఉండటం గమనించారా? ముఖ్యమైన రీవ్యూలను పోలిస్ కమాండ్ అండ్ కంట్రోల్ సెంటర్‌లో నిర్వహించడం హాట్ టాపిక్‌గా మారింది. దీని వెనుక వాస్తు మార్పులేనా? అనే చర్చ సాగుతోంది. మరి ఈ విషయాల్లోకి వెళదాం!
సమీప కాలంలో సీఎం రేవంత్ రెడ్డి సచివాలయానికి మార్పులు చేయాలని నిర్ణయించారు. సీఎం కాన్వాయ్ ప్రధాన ద్వారాన్ని వెస్ట్ గేట్‌కు మార్చబోతున్నారనే వార్తలు ఉన్నాయి. ఇకపై ఈస్ట్ గేట్ నుంచి సీఎం కాన్వాయ్ బయటకు వెళ్లనుందని తెలుస్తోంది. ఐఏఎస్, ఐపీఎస్ అధికారులు మాత్రం ఈస్ట్ గేట్ నుంచి ఎంట్రీ పొందనున్నారు. సచివాలయ సింహ ద్వారం మూసివేయబడింది.
సీఎంగా బాధ్యతలు స్వీకరించిన తర్వాత, రేవంత్ రెడ్డి తనదైన శైలిలో మార్పులు చేస్తున్నారు. పీసీసీ అధ్యక్ష పదవికి వచ్చినప్పుడు గాంధీ భవన్‌లో వాస్తు ప్రాతిపదికన మార్పులు చేసిన విషయం తెలిసిందే. ఈ చర్యలు వాస్తు కారణాల వల్ల జరిగాయని భావిస్తున్నారు.
గత వారం రోజులుగా, సీఎం రేవంత్ రెడ్డి బంజారాహిల్స్‌లోని ఇంటిగ్రేటెడ్ కమాండ్ అండ్ కంట్రోల్ సెంటర్ నుండి ముఖ్యమైన రీవ్యూలను నిర్వహిస్తున్నారు. ముఖ్యమైన మీటింగ్‌లు, సమీక్షలు సచివాలయానికి కాకుండా నివాసం లేదా ఐసిసిసి నుండి నిర్వహిస్తున్నారు. ఇవాళ కూడా సీఎం రెండు రీవ్యూలను ఐసిసిసి నుండి నిర్వహించారు. సాధారణంగా డిజాస్టర్ మేనేజ్‌మెంట్, వర్షాలు, వరదలు పై సమీక్షలు ఐసిసిసి నుండి నిర్వహించటం సర్వసాధారణం కానీ, వ్యవసాయ శాఖ, సహకార శాఖ రీవ్యూలు కూడా అక్కడే జరపడం ఆసక్తికరంగా ఉంది.
సచివాలయం లోపల కూడా మార్పులు జరుగుతున్నాయని వార్తలు వినిపిస్తున్నాయి. సచివాలయం చాలా ఇరుకుగా, ఇబ్బందికరంగా ఉందని మంత్రులు, అధికారులు భావిస్తున్నారు. ప్రస్తుతం సచివాలయంలోని సిఎం చాంబర్‌లో మార్పులు జరుగుతున్నాయని తెలుస్తోంది. మునుపటి సీఎం కేసిఆర్ వాడినే చాంబర్లనే వాడుతున్నారు. వీటిలో ఉన్న ఇబ్బందులు, వాస్తు సమస్యలను పరిష్కరించేందుకు మార్పులు చేస్తున్నట్లు తెలుస్తోంది.
సోమవారం, ఒక రీవ్యూ జరిగిన తర్వాత, ఓ కార్య‌క్ర‌మంలో పాల్గొన‌డానికి ర‌వీంద్ర భార‌తికి వెళ్లి, అక్కడినుంచి తిరిగి ఐసిసిసి కి వెళ్ళి వ్యవసాయం పై రీవ్యూ నిర్వహించారు. దీంతో ఈ వాదనకు మరింత బలం చేకూరుతోంది. మొత్తం మీద, సీఎం సచివాలయానికి కాకుండా ఇతర ప్లేసెస్ లో రీవ్యూ నిర్వహించడం ఇప్పుడు కొత్త ప్రచారాలకు తెరతీసింది. దీనిపై సీఎంవో ఎలా స్పందించి, ఏం సమాధానం చెప్పబోతుందో చూడాలి.
